21 сентября 2022
Тропарь, глас 4-й
Рождествó Твоé Богорóдице Дéво, рáдость возвести́ всей вселéнней: из Тебé бо возсия́ Сóлнце прáвды Христóс Бог наш, и разруши́в кля́тву, дадé благословéние, и упраздни́в смерть, даровá нам живóт вéчный.




Кондак, глас 4-й

Иоаки́м и Áнна поношéния безчáдства, и Адáм и Éва от тли смéртныя свободи́стася, Пречи́стая, во святéм рождествé Твоéм. То прáзднуют и лю́дие Твои́, вины́ прегрешéний избáвльшеся, внегдá звáти Ти: неплóды раждáет Богорóдицу и питáтельницу жи́зни нáшея.

Величание

Величáем Тя, Пресвятáя Дéво, и чтим святы́х Твои́х роди́телей, и всеслáвное слáвим рождествó Твоé.